مشاكل القدم

بعض الناس بيعانوا مش مشاكل فى القدم ممكن تمنعهم يلبسوا مثلا أحذية مفتوحة  حتى لو فى الصيف عشان بيتحرجوا يبينوا رجلهم والحكاية دى ممكن يكون أسبابها كتير مثلا :

- اصابة الأظافر بالفطريات وده بيخلى الأظافر لونها يتغير وتبقا سميكة رغم انها ضعيفة اوى والحالة دى لازم تتعالج بمضاد للفطريات موضعى كريم أو اسبراى يعنى ده لو الحالة خفيفة لكن لو الحالة شدية هنستخدم اقراص مضادة للفطريات عن طريق الفم + مضاد للفطريات موضعى .

-  القدم المسطحة واللى احنا عارفينها باسم فلات فوت  (flat foot ) وفيها بيكون باطن القدم بالكامل ملامس للأرض وطبعا بتكون مؤلمة عند الوقوف لفترة طويلة أو لو المريض بيعانى من زيادة الوزن وطبعا دى بنعالجها بتمارين معينة بنقوى بيها القدم وكمان اننا نلبس أحذية  مناسبة تساعد اننا نعود القدم على الانحناء الطبيعى للقدم .

- النقرس أو زيادة الأملاح فى الدم مثل حمض اليوريك وده بيعمل بلورات بتترسب فى مفاصل الأصابع فى القدم  وده بيعمل ألم شديد واحمرار وأحيانا تورم للقدمين وده بنعالجه  بأدوية مضادة للاتهاب وأدوية لتقليل نسبة تركيز الأملاح فى الجسم وطبعا النظام الغذائى والامتناع الكامل عن اللحوم الحمراء .

- ممكن يبقا فى دمامل فى باطن القدم  و بتكونة مؤلمة و معدية  وخصوصا من المراحيض العامة  وبتتعالج بالليزر أو جراحيا .

الفرق بين تاريخ الصلاحية وتاريخ نهاية الاستخدام

كتير مننا بينسوا يسألوا على تاريخ الصلاحية للأدوية اللى بيشتروها أو أنهم يشوفوها على علب الأدوية وفى ناس بتعرف تاريخ الصلاحية بس مش بيعرفوا يستغلوا المعلومة دى صح لأنها للأسف فى بعض أنواع الأدوية بتكون معلومة غير كاملة  لأنهم بيعتقدوا ان الدوا هيفضل فعال حتى بعد فتحه واستعماله عشان كده حبيت نوضح الفرق بين حاجتين هما تاريخ الصلاحية وتاريخ نهاية الاستخدام   .

تاريخ الصلاحية :

ده التاريخ بتاع الدوا اللى انا لسة ما استعملتوش ولا حتى فتحته بمعنى ان انا لو عندى دوا تاريخ صلاحيته مثلا هينتهى فى شهر مايو سنة 2012 يعنى لو انا لسة الدوا ده ما فتحتوش ومركون على الرف فى الصيدلية ده هتنتهى صلاحيته فى مايو 2012  لكن .......

تاريخ نهاية الاستخدام :

ده التاريخ بتاع الدوا بعد ما انا فتحته وابتديت استعمله لانى كده ابتديت مرحلة جديدة فى التعامل مع الدوا وأول ما فتحته هابتدى احسب مدة جديدة بعدها مش هأقدر استعمله بعدها لأنه هيكون بعدها باظ خلاص وطبعا ده مش بيتم تطبيقه على كل أشكال الأدوية يعنى مثلا الأقراص والكبسولات  وطبعا التاريخ ده مش بيكون مكتوب على علبة الدوا لكن الصيدلى اللى انت بتشترى منه الدوا هو اللى بيقولك عليه .

الأدوية اللى أنا هاطبق عليها تاريخ نهاية الاستخدام زى ايه :

- قطرات العين : بعد 14-28  يوم من فتحها بتكون غير صالحة للاستعمال .

- المضادات الأدوية اللى بتكون فى صورة بودرة وبنحضرها بالماء المقطر أول ما بتتحول من بودرة لسائل : أخرها 10 أيام بعد تحضيرها وما نستعملهاش تانى .

- الكريمات :

وهنا فى احتمالين لو الكريم معبأ فى أنابيب يبق أخره 3 شهور

ولو معبأ فى برطمانات يبقا أخره شهر بس 

- المراهم : أخرها 3 شهور

ياريت نخلى بالنا عشان صحكتوا تهمناا

 

ليه غلط اننا منكملش كورس الدوا ؟

الواحد مننا يتعب وينزل للدكتور ويروح الصيدلية يشتري الدوا وبعد ما ياخدله كبسولتين ولا قرصين ويلاقي نفسه اتحسن يقول اوديكي فين يا قوة وميكملش العلاج مع انه ممكن بعدها هيتعب تانى وجايز اكتر من الأول .القصه وما فيها ان مثلا المضاد الحيوي بيقاوم البكتريا المتسببه في المرض واللي الدكتور لما بيشخص المرض بيكون عارف نوع البكتريا دي ومحتاجه اى نوع من المضادات الحيوية والمفروض تتعالج لمدة  اد ايه فلما بنقطع الدوا قبل المعاد المحدد  او لما نلخبط فى المواعيد او الجرعة اللى قاللنا عليها الدكتور المعالج ممكن البكتريا تستجمع قوتها تاني وممكن كمان تتعود على المضاد وتكسب مناعة ضده ومتتأثرش بيه بعد كده لان الطبيعى بالنسبة للبكتيريا انها كل شوية بتطور طرق مقاومتها ومحاربتها لانواع المضادات الحيوية وده سبب ان فى فى مضادات حيوية كتير ما بقتش تستعمل لانها خلاص فقدت تاثيرها على البكتيريا .فياريت نيجي على نفسنا شوية ونكمل الدوا لحد ما الدكتور يقول ستوب او الجرعة المحددة تخلص  .