الأنيميا - الجزء التانى

احنا دلوقتى ان شاء الله رب العالمين هنكمل الموضوع اللى بدأناه المرة اللى  فاتت وهنكمل كلام عن أنواع الانيميا ولو فى أى حاجة نقدر نعملها عشان نقدر نتعامل معاها .

كنا اتكلمنا عن انيميا نقص الحديد وانيميا الفول ودلوقتى هنتكلم عن تالت نوع وهو :

انيميا الخلايا المنجلية :

ده مرض وراثى طبعا بيورثه الأبناء من الأب والأم وده عبارة عن خلل فى شكل خلايا أو كرات الدم الحمرا لأنها فى المرض ده بيكون شكلها شبه المنجل ومن هنا طبعا جت التسمية بالانيميا المنجلية ونتيجة ده انها بتكون صلبة وسهل تتكسر وكمان  بتتحرك بصعوبة جدا فى الأوعية الدموية الرفيعة وده بيخلى الأكسجين اللى رايح للجسم وأعضائه يقل .

أعراض النوع ده :

طبعا بالنسبة للاطفال الأعرض مش بتظهر غير لما الطفل بيوصل لعمر 6 شهور .

بالنسبة للمرض ده بتظهر أعراضه بسبب نقص الأكسجين أو الجفاف  وطبعا  لو  ما اتعالجش  بسرعة ممكن يحصل مشكلة  للأنسجة  عشان الأكسجين مش هيوصللها .

وطبعا فى أعراض تانية بتظهر زى :

- صعوبة فى التنفس .

- ألم فى العظام والمفاصل .

- ألم فى البطن والظهر .

- ممكن يظهر دم فى البول لأنه ممكن حصل ضرر فى الكليتين .

العلاج :

مفيش للأسف علاج نهائى قاطع للمرض ده لكن كل اللى بنقدر نعمله هو اننا نخفف من

حدة المرض ونحاول نحافظ على المريض فى حالة مطمئنة وده بيكون عن طريق :

- جراحات زرع نخاع العظام .

- شرب الماء والسوائل بكمية كبيرة .

- نبعد عن المجهود الشديد والزيادة .

الوقاية : 

طريقة الوقاية الوحيدة هى فى الفحوصات اللى لازم تتعمل قبل الزواج على الأقل لازم يكون طرف من الطرفين سواء الزوج أو الزوجة ما عندوش المرض ده ولا حتى حامل ليه بمعنى أنه يكون عنده جين المرض .

رابع نوع هنتكلم عنه دلوقتى هو:

انيميا البحر المتوسط ( الثلاسيميا ) :

ده برده للأسف مرض وراثى من أمراض الدم بيتنقل من الآباء الى الأبناء و زى ما هو واضح من اسم النوع ده انه بينتشر أكتر فى البلاد الموجودة حوالين البحر الأبيض المتوسط . وبيحصل ان انتاج الدم لمادة الهيموجلوبين اللى احنا اتكلمنا عنها قبل كده بيقل جدااا وبيحصل تكسر لكرات الدم الحمرا وممكن ده بيحصل بشكل مبكرأوى لما الطفل بيكمل سنة من عمره لكن طبعا مش قبل كده .
الأعراض : 

•  اصفرار البشرة يعنى تبقا شاحبة كده وده أول حاجة ممكن يلاحظها أهل الطفل المصاب .
•  فقدان الشهية ونقص الوزن . 
•  كل شوية يتعب ويصاب بالتهابات .
•   الأم بتلاحظ ان الطفل متأخر فى النمو .

طيب بالنسبة لطرق العلاج : 

 أهم حاجة أكتر من العلاج كمان هى الوقاية وده بيحصل بس لو عملنا كل الفحوصات اللازمة لأى اتنين مقبلين على الجواز .

لكن فى حالة المرض بقا يبقا لازم نهتم بأننا نعمل اللى هقول عليه دلوقتى :

• لازم يكون المريض تحت اشراف طبى متواصل ومتخصص وطبعا فى مراكز متخصصة للحاجات دى لأنه ممكن هيحتاج لنقل دم .
•  الأدوية اللى هيقول عليها الطبيب المعالج نلتزم بيها زى دوا اسمه الديسفيرال وده بنستخدمه عشان نتخلص من نسبة الحديد اللى بيتراكم فى الجسم بسبب عمليات نقل الدم المتكررة للمريض .
• يبقا فى رعاية وملاحظة دايمة للمريض فى البيت .
• لازم نأهل المريض نفسيا أنه يتقبل نفسه كده ويتعامل بشكل طبيعى .
• ممكن بقا المريض يحتاج لزراعة نخاع بس فى حاجات لازم يراعيها الطبيب سواء فى المريض أو فى الشخص اللى هيتبرع بالنخاع .

بالنسبة للمتبرع :

لازم يكون سليم صحيا ومش بيعانى  من أى مشاكل صحية أو أمراض ممكن تأثر عليه بعد عملية التبرع ولا تأثر على المريض .

بالنسبة للمريض :

لازم ناخد فى الاعتبار :

  *  عدد مرات نقل الدم ونسبة الحديد في الجسم
  *  مدى تأثر أعضاء الجسم وخاصة الكبد بسبب زيادة الحديد
  *  إنتظام العلاج بالديسفيرال وتقبله

  *  نسبة التطابق النسيجي بين المتبرع والمريض

لسه برده هنكمل باقى أنواع الانيميا المرة الجاية خليكوا معااااااااانا

الانيميا - الجزء الأول

فى ناس كتير سواء كبار أو أطفال كانوا بيتعبوا ولما بيروحوا للدكتور يطلب شوية تحاليل وبعد كده يقول للمريض انت عندك انيميا ويكتبله شوية مقويات وبنسمع من ناس تانيين أن فى ناس عندهم حاجة اسمها انيميا الفول وطبعا كتير أوى مننا ما يعرفش يعنى ايه انيميا الفول طيب الكلام اللى فات ده كله أنا قلتله ليه ؟ أكيد أنا غرضى من الكلام ده انى اتكلم عن مرض الانيميا وأنواعه اللى مش كلنا نعرفها وحكاية كل نوع ايه  وأنا اخترت المرض ده نتكلم عنه النهردة لأنه من الأمراض المعروفة واللى اسمها دايما بنسمعه وطبعا لازم نبقا فاهميين  علشان كده يللا بينا نبتدى والموضوع هيبقا فى صورة سؤال واجابته علشان نركز

يعنى ايه انيميا ؟  

الانيميا أو فقر الدم هو مرض سببه وجود خلل فى مكون من مكونات الدم زى الحديد مثلا أو الهيموجلوبين أو نقص فى عدد كرات الدم الحمراء أو تغير فى شكلها  أو خلل فى انزيم معين وبينتج عن ده طبعا فى النهاية تكسر لكرات الدم الحمراءوبيعمل أعراض معروفة هنتكلم عنها دلوقتى

ايه هى أنواع الانيميا ؟

• انيميا نقص الحديد فى الدم
• انيميا الفول
• انيميا الخلايا المنجلية
• انيميا البحر المتوسط
• انيميا نقص فيتامين ب 12 أو الانيميا الخبيثة .
• انيميا نقص حمض الفوليك .
• الانيميا الأبلاستية .

دلوقتى بقا هناخد نوع نوع كده بالراحة ونتكلم عنه بالتفصيل الممل
انيميا نقص الحديد فى الدم :

دى أكتر أنواع الانيميا انتشارا والأنثى معرضة للاصابة بالنوع ده أكتر من الذكر وطبعا لازم نكون عارفين ان الحديد مهم جدا فى صناعة مادة الهيموجلوبين الموجودة فى الدم واللى بتعتبر من أهم مكونات الدم والمادة دى هى اللى بتشيل الأكسجين وتنقله لكل أجزاء الجسم عشان كده لما بيحصل نقص فى المادة دى بيحصل صعوبة فى التنفس وارهاق سريع من أقل مجهود وده هنتكلم عليه فى الأعراض بتاعت الانيميا .

 الأسباب:
انيميا نقص الحديد فى الدم ممكن تحصل لأكتر من سبب زى فقدان الدم أو النزف بشدة سواء بكميات كبيرة أو لفترات طويلة  أو التغذية الغير متوازنة برده يعنى ايه ؟

يعنى مثلا:

-الانثى اللى عندها غزارة فى دم الحيض لأنها بتفقد كمية دم كبيرة بيبقا صعب تعويضها تانى بسرعة
-الست الحامل كمان ممكن يجيلها انيميا لأن طفلها بيعتمد عليها فى تكوين جسمه وبيسحب العناصر المهمة منها وكمان اللى بترضع 
-الناس اللى مش بياكلوا أكل صحى ومتوازن أو بمعنى اخر عاملين رجيم غير صحى أو مش بياكلوا الأكلات الغنية بالحديد
- أى شخص بعد العمليات الجراحية أو الستات بعد الولادة
-الناس اللى بتاخد اسبرين بكميات كتيرة
الأعراض  :
1) شحوب في الجلد والوجه والشفاه .
2) سرعة التنفس وخصوصا عند عمل مجهود ودى اتكلمنا عليها من شوية .
3) خفقان في القلب .
4) احمرار في اللسان .
5) نقص في الطاقة والحيوية .
6) الخمول والتعب .

7) الارهاق والدوخة . 

8) صعوبة التركيز .

العلاج والوقاية :

هنلاقى هنا ان طرق العلاج متشابهة شوية مع طرق الوقاية وده بسبب ان دايما بيكون هدفنا اننا نزود نسبة الحديد فى الدم وعشان كده لازم نظبط أكلنا وناكل الأطعمة الغنية بالحديد زى : العسل الأسود - الكبدة - التفاح - البلح - التين - الجوافة  - الرمان - الباذنجان - الجرجير - السبانخ - الملوخية - البقدونس - الحلبة - القلقاس .

بس طبعا بيبقا فى حالات من الانيميا لازم مع الأكل المتوازن تاخد كمان أدوية تحتوى على الحديد وممكن يكون معاه فيتامينات تانية والجرعة بتكون على حسب شدة الحالة وده اللى بيحدده الطبيب المعالج بعد ما بيشوف تحليل الدم (صورة دم كاملة ) ويعرف منها نسبة الهيموجلوبين وكرات الدم الحمراء عند الشخص المريض ده أد ايه .
تانى نوع هنتكلم عنه هو :

انيميا الفول :

 ايه هى انيميا الفول وأسبابها ايه ؟
ده مرض بيحصل نتيجة حدوث خلل فى انزيم معين فى الجسم اسمه G6PD والمرض ده مرض وراثى لأنه بيكون نتيجة حدوث طفرة على أحد الكروموسومات وهو كروموسوم اكس  X عشان كده المرض ده لما بيصيب الذكور بيكون اتنقللهم من الأم وليس الأب ده طبعا لو كانت الأم مريضة بانيميا الفول أو حاملة بس للمرض ( يعنى عندها جين المرض لكن أعراضه مش ظاهرة عليها بس ممكن تنقله للجنين بتاعها وخصوصا لو كان ولد بيبقا الاحتمال أكبر وطبعا بنعرف أنها حاملة للمرض عن طريق تحاليل الدم )    
المرض ده ممكن يحصل فى أى سن ولكن الغالب يعنى أنه بيظهر لما الشخص المريض بياكل أى حاجة من أنواع البقوليات زى الفول والعدس أو استنشاق حبوب اللقاح بتاعت نبات الفول . 
طيب برده ايه علاقة البقوليات بالانزيم اللى فيه مشكلة ؟ 
ببساطة البقوليات بنعتبرها مادة مؤكسدة بتدخل عنصر الهيدروجين للدم والهيدروجين ده لو فضل موجود فى الدم كده هيكسر كرات الدم الحمراء ويعمل انيميا .
والأشخاص اللى مش عندهم انيميا الفول وبيكون الانزيم عندهم طبيعى كرات الدم الحمرا مش بتتكسر عندهم لأن الانزيم ده بيكون مادة بتسحب هى الهيدروجين اللى موجود فى البقوليات عشان كده لما الانزيم يبقا فيه مشكلة هتحصل الانيميا .
ايه أعراض انيميا الفول ؟ 
الأعراض مش خاصة بس بانيميا الفول لكن مشتركة بينها وبين أى مرض تانى بيعمل نفس الموضوع فى كرات الدم الحمرا ويكسرها بس المشكلة ان ده ممكن يحصل بشكل مفاجئ ولازم المريض يتلحق بسرعة ويروح المستشفى .
طرق العلاج والوقاية :
للأسف جدااا مفيش علاج للمرض ده بس كل اللى بنقدر نعمله اننا بنخلى المريض يتجنب حاجات معينة هنقولها دلوقتى عشان ما يتعبش وتظهر الأعراض عليه ويبتدى دمه يتكسر والحاجات دى هى :
- كل البقوليات زى الفول والعدس والحمص واللوبيا وغيرها .
- ما ياخدش لا فيتامين K ولا فيتامين  C 
- يبعد تماما عن الأدوية المضادة للملاريا وأى أدوية فيها مادة السلفا أو مشتقاتها وعن        المسكنات وأدوية الروماتيزم وأدوية تانية كتير غيرها 

  عشان كده أى مريض بانيميا الفول لازم لما يروح للدكتور يعرفه انه مريض بالمرض    ده عشان ياخد معاه الاحتياطات اللازمة 

المرة الجاية ان شاء الله هنكمل الموضوع ونتكلم عن باقى الأنواع تابعوووووووونى

      

مسكنات الألم

قبل ما اتكلم فى موضوع النهردة لازم أقول ان كلنا تقريبا جربنا المسكنات وأكيد كمان أنواع كتيرة منها أيا كان السبب ايه المهم انه بيبقا فى ألم وممكن فى أغلب الأوقات يكون غير محتمل وعشان كده أنا كان لازم أتكلم فى الموضوع ده وخصوصا ان المسكنات من أكترالأدوية اللى بتتباع فى الصيدليات وده طبعا من وجهة نظرى الشخصية عموما خلونى أبدأ : فى البداية يا جماعة لازم نعرف حاجة وهى أن غالبية المسكنات ده ان ما كانتش كلها تستعمل كمضادات للالتهاب كمان بس طبعا فى مواد فعالة فيها القدرة على تسكين الألم أكتر من معالجة الالتهابات والعكس صحيح  وكمان لازم المسكنات ما تتاخدش على معدة فاضية يعنى لازم تكون بعد الأكل وده طبعا عشان ما تتعبش المعدة عشان المسكنات على معدة فاضية وعلى المدى الطويل بتعمل قرحة فى المعدة ودى بتبقا متعبة أوى وبتحتاج كورس علاج لوحدها 
طيب احنا فى كلامنا هنبدأ بمادة الباراسيتامول واللى موجودة فى أدوية كتير فى الصيدليات وبتنتجته أكتر من شركة أدوية زى البارامول - البانادول وغيرها

مادة الباراسيتامول تعتبر من أضعف المسكنات وبتستعمل كمان كخافض للحرارة ومتوافر منها الأقراص والأقماع للكبار والشراب والأقماع للأطفال ورغم  ان المادة دى ضعيفة بس هى أكثر أمانا فى الاستعمال بالنسبة للستات الحوامل وكمان للأطفال وخصوصا الأطفال حديثى الولادة بس طبعا لازم نراعى حاجة مهمة جدا وهى اننا ما نقولش اه ده  آمن وناخده بالجرعة والكمية اللى تعجبنا لاااااااااا ....... بس لازم ناخده بالجرعة اللى هيقول عليها الطبيب أو الصيدلى وأكيد طبعا هنسأل ليه ؟؟؟ لأن كل دواااا ليه حاجة اسمها أكبر جرعة آمنة  ولو احنا عدينا الجرعة دى وادينا المريض جرعة أكبر أكيد هيبقا فى ضرر عشان كده ياريت نلتزم بالجرعة والمواعيد بتاعت الأدوية  بس كمان الباراسيتامول لازم يستعمل بحذر مع مرضى الكبد يعنى اى مريض عنده مشكلة فى الكبد حتى لو بسيطة
تانى مادة هنتكلم عنها هى الايبوبروفين 
والمادة دى برده بنعتبرها آمنة بس هى أقوى شوية من الباراسيتامول وكمان ممكن بتستخدم كخافض للحرارة وكمضاد للالتهابات وتنفع للكبار وللاطفال بس ما يفضلش استخدامها مع الحوامل وطبعا موجود منها تركيزات كتيرة 
بعد كده لقينا شركات بتعمل أدوية فيها مادة الباراسيتامول مع مادة الايبوبروفين عشان تعمل تأثيرأحسن         
تالت مادة هنشوفها مع بعض هى ديكلوفيناك الصوديوم أو البوتاسيوم


والمادة دى بجد تعتبر من أفضل المواد المسكنة للآلام ومن أفضل مضادات الالتهاب وطبعا ما بنستخدمهاش كخافض للحرارة بس المادة دى بنستخدمها بحذر لأى مريض عنده مشكلة فى الكلى و عموما المفروض ما نستعملهاش بصفة مستمرة خليها عند اللزوم بس مش عمال على بطال زى ما بيقولوا
وطبعا فى مواد مسكنة كتيرة بس المواد اللى احنا اتكلمنا عليها دى أشهرها بس دلوقتى هنتكلم عن الاسبرين والمعروف فى الصيدليات  باسم ريفو أو أسبوسيد
وطبعا الدوا ده حالة خااااصة جداااا ليه بقا ؟ عشان كان زمان الناس كانوا بيستعملوه كمسكن بشكل أساسى أوى بس احنا حاليا ما بنحبش نستعمله الا فى حالات معينة زى ايه ؟ يعنى مثلا بنستعمله مع مرضى الضغط المرتفع وطبعا بيكون مع الأدوية اللى بتقلل الضغط عشان الأسبرين بيعمل سيولة فى الدم وبيحمى مرضى الضغط المرتفع انهم يصابوا بالجلطات وممكن يستعمل مع الحوامل بجرعة معينة عشان نفس السبب بس لازم نخلى بالنا من حاجة لو المريض عنده نزيف أو ربو أو حساسية من الأسبرين أو عنده مشكلة أو قرحة فى المعدة ما ياخدش أى أدوية فيها أسبرين مع الشخص السليم ما بنحبش نستعمله على الرغم من ان فى دراسة حديثة قالت ان الأسبرين له فوايد كبيرة أوى فى محاربة أمراض كتيرة ولازم ناخده بجرعات خفيفة أوى عشان الوقاية من الأمراض دى زى مثلا : مرض القلب المرتبط بمرض السكر - مرض الزهايمر ونقص القوة الادراكية - الجلطات
واخر حاجة هنتكلم عنها هى المسكنات القوية أوى واللى مصنفة تحت اسم أدوية الجدول ودى بتستعمل فى حالات الألم الشديد الحااااد مثلا زى الالام بسبب مرض السرطان ربنا يحمينا ويحفظنا منه جميعا  

التهاب الأذن الوسطى

ايه هى الأذن الوسطى بالظبط ؟

الأذن الوسطى موجودة بالظيط ورا طبلة الأذن وحجمها صغير وبتكون متصلة بالجزء العلوى من الحلق اللى احنا بنسميه البلعوم الأنفى وطبعا ده عن طريق قناة ضيقة اسمها قناة استاكيوس والقناة دى فايدتها كبيرة اوى لأنه عن طريقها بيتم تصريف السوائل من الأذن للحلق وكمان بتوازن ضغط الهوا فى الأذن 

طيب يعنى ايه التهاب فى الأذن الوسطى ؟

الفراغ اللى موجود جوه الأذن الوسطى المفروض بيكون مليان هوا لكن ممكن فى بعض الحالات تتراكم فيها سوائل وهنا بقا المشكلة وهو ده اللى هيعمل الالتهاب وده غالبا بيحصل بعد أى مشكلة تحصل فى الجهاز التنفسى العلوى زى الزكام والتهابات الحلق واللوز والحساسية لأان البكتيريا بتتنقل للأذن الوسطى عن طريق قناة استاكيوس والسوائل والافرازات المتراكمة هناك هتبقا وسط مناسب جدا ان البكتيريا ده تتكاثر وتعمل الالتهاب اللى احنا بنتكلم عنه دلوقتى 

ويا ترى الالتهاب ده معدى والا لأ ؟ ومين معرض اكتر للاصابة بيه ؟

طبعا التهاب الأذن الوسطى غير معدى لكن التهابات الجهاز التنفسى العلوى زى الزكام والأنفلونزا وغيرها هى اللى معدية 

طبعا اى حد مننا معرض للاصابة بالتهاب الأذن الوسطى بس طبعا بعد الشر عنكوا لكن أكتر ناس معرضين للنوع ده من الالتهاب هما الأطفال لأن قناة استاكيوس عندهم اقصر فى الطول وبتكون مستقيمة اكتر من الموجودة عند الكبار عشان كده تراكم السوائل فيها بيكون أكتر 

ايه الأعراض ؟

ألم فى الأذن - ارتفاع فى درجة الحرارة - حكة فى الأذن - خروج افرازات من الأذن -

ضعف السمع قليلا وطبعا ده بيكون مؤقت لحد ما نعالج الالتهاب - الرضيع ممكن بيعيط أثناء الرضاعة - الخمول

واكيد طبعا لازم نعرف المضاعفات : 

أى مرض هنهمل علاجه أو ما نعالجوش كويس طبعا غير انه هيتكرر تانى بسرعة بس لازم هيبقاله مضاعفات والمضاعفات هنا اكيد هتبقا زيادة فى حدة الالتهاب والألم وممكن لا قدر الله توصل انه يحصل ثقب فى طبلة الأذن وبالتالى فقدان السمع

طيب ايه طرق الوقاية ؟   

 بما أننا قلنا أن الالتهاب ده منتشر أكتر فى الأطفال يبقا لازم نحميهم ونخليهم ما يتعرضوش لدخان السجاير - ما نخليش الطفل الرضيع يرضع وهو نايم على ضهره عشان السوايل ما توصلش لقناة ستاكيوس زى ما قلنا قبل كده - نحاول نقى نفسنا من الزكام والانفلونزا والتهابات الجهاز التنفسى عشان ما يتطورش الموضوع لالتهاب فى الأذن الوسطى - أى شخص عنده حساسية صدرية يخلى باله من نفسه ويتجنب التراب والتدخين وكل الحاجات اللى ممكن تتعبه

طرق العلاج بقا ايه ؟

 لو الالتهاب فيروسى يعنى السبب فيه فيروس مش بكتيريا وطبعا ده اللى هيحدده الطبيب المعالج هيبقا العلاج بمضادات للالتهاب ومسكنات للألم وهيبقا المريض تحت الملاحظة
لكن لو سبب الالتهاب بكتيريا يبقا لازم هنعالج بالمضادات الحيوية اما عن طريق الفم أو بالحقن وطبعا معاها مضادات للالتهاب ومسكنات للألم وهنمنع خالص استعمال أى نقط للأذن لأنى كده هأزود السوائل المتراكمة فى قناة استاكيوس وده معناه انى هأزود المشكلة مش هأعالجها